“Kabaja e usta Vangjelit” është vijim dhe një zhvillim i natyrshëm i kabave tradicionale të Toskërisë me motive baritore e pastorale, traditë që e themeloi Selim Asllan Leskoviku me shokët. “Kabaja e usta Vangjelit” shfaqet si kaba me dy pjesë: kaba dhe valle.
Pjesa e parë, kabaja konsiderohet si “kaba e shtruar” ku roli i gërnetës lidhet ngushtë me hulumtimin e mjedisit natyror ku ai dhe shokët e sazeve zhvillonin veprimtarinë e tyre. Në kabanë e tij ndiejmë qartë raportin mes njeriut dhe natyrës së bukur të zonës së Përmetit dhe Leskovikut, e cila shprehet përmes panoramimit tingullor në të gjithë hapësirën e regjistrit muzikor të gërnetës. Mjaft qartë konstatojmë se gërneta duket sikur këndon, aq e ngjashme është me këngëtarin në mënyrën e artikulimit të tingullit. Ky model i “Kabasë së Vangjelit” u përthith më pas nga shumica e gërnetarëve të Shqipërisë së Jugut të cilët nuk harruan ta citonin atë si “Kabaja me gishtin e usta Vangjelit”, duke i njohur meritën e strukturimit të këtij tipi kabaje baritore. Pjesa e dytë, vallja, është një muzikë e gëzuar në metër dypjesëtues, tipike për vallet e vajzave dhe grave të zonës së Leskovikut dhe Përmetit.
Ndërtimi më i preferuar për sazet ka qenë 1 gërnetë, 1 qemane dhe 2 llauta. Shpeshherë usta Vangjeli përdorte edhe një ndërtim disi të veçantë me 1 gërnetë, 1 violinë dhe tri llauta. Defi nuk ka qenë përdorur në formacionet e para të sazeve, si në Përmet ashtu edhe në Leskovik.
Në regjistrimet muzikore ku është regjistruar edhe kjo kaba, morën pjesë usta Mediu me gërnetë dhe fyell, Mitroja, i vëllai i Vangjelit me qemane, llautë dhe këngëtar, Nesim Meko nga Përmeti me qemane dhe këngëtar dhe Abaz Delvina me dajre.