Gërnetari i Sazeve të Fierit Nexhip Saçmja (1935–1998), renditet si një ndër muziktarët popullorë më të shquar të Myzeqesë. Ka lindur në vitin 1935 në një familje rome që sipas të dhënave që vijnë nga i ati i tij, Bajrami, familja Saçmja ka qenë ndër të parat familje rome të stacionuara në Myzeqe. Fillimisht në Marinëz të Roskovecit dhe pas 5 vjetësh në Baltëz të Fierit. Fisi Saçmja çmohet si një fis me gen muzikor. Kjo provohet nga fakti që Nexhipi i mori mësimet e para nga i ati, i cili interpretonte në daulle e dajre. Nga daja i tij Neim Shima, ai mësoi gërnetën popullore. Ishte ende fëmijë në shkollë kur u shfaq me gërnetë në dorë në aktivitetet e shkollës dhe gëzimet e fshatit. Bashkë me të interpretonte në gërnetë edhe Shyqyriu, vëllai i tij dhe më pas u bashkuan edhe vëllezërit dhe familjarë të tjerë. Shumë shpejt Myzeqeja i njohu dhe i pranoi si sazet e veta. Pas kryerjes së shërbimit ushtarak në Shkodër, rikthimi i tij në qytetin e Fierit shënoi rritjen e veprimtarisë së sazeve të tij, gjë që solli edhe caktimin e Nexhipit edhe si drejtues i muzikës në qendrën kulturore të zonës së Semanit.

Në vitet 1970 saze e tij ishin njohur kombëtarisht pas dhjetëra e qindra dasmave, shumë koncerteve folklorike të organizuara, pjesëmarrjeje në festivalet vendore e kombëtare në Gjirokastër etj. Një pjesë e këtij aktiviteti u regjistrua edhe në RTSH. Nexhip Saçmja u dallua kryesisht për kabatë, vajtimet, vallet instrumentale, si këngëtar dhe valltar i shquar i dyshes myzeqare. Ende kujtohen interpretimet e sazeve të tij si: “Pritja e nuses”, “Përcjellja e dhëndrit”, “Pritja e krushqve” etj.

Sazet e tij ishin të preferuara jo vetëm në familjet myzeqare, por edhe në ato çame, kosovare dhe më gjerë. Në vitet 1960–1990 ka përfaqësuar rrethin e Fierit në të gjitha festivalet folklorike kombëtare. Nexhip Saçmja është dekoruar nga me urdhrin “Naim Frashëri” në vitin 1975 dhe me shumë çmime e vlerësime të tjera.  Ai u nda nga jeta në dhjetor të vitit 1998, në moshën 63-vjeçare. Trashëgiminë e tij muzikore e vazhdojnë djemtë e tij muziktarë, më i njohuri prej tyre Bajram Saçmja fitues i çmimit “Laver Bariu”, si dhe nipërit dhe stërnipërit e shumtë. Ende sot, familja e muziktarëve Saçmja, për vlerat e saj zë kryet e vendit në sazet e Myzeqesë.